Nisin udhëtimin pullet e reja të Kosovës me imazhin e Dua Lipës

Posta e Kosovës e ka nderuar maksimalisht Dua Lipen. Pullat më të reja postare të Postës së Kosovës, me imazhin e këngëtares me famë ndërkombëtare, Dua Lipa, nga dita e sotme kanë nisur të udhëtojnë në të katër anët e botës, kudo ku këngëtarja ka miliona e miliona adhurues.

Ky emision i pullave postare është promovuar dje në Prishtinë.

Shefja Ekzekutive e Postës së Kosovës Fakete Kadiu i ka dhuruar Dua Lipes pullat e para postare si dhe një pullë postare e punuar në pllakë bronzi. Po ashtu edhe babait të saj, Dukagjin Lipa.

“Dua është fituese e shumë çmimeve prestigjioze, por pulla postare me pamjen e saj është një mirënjohje unike dhe për këtë Posta e Kosovës është shumë krenare”, ka thënë a Kadiu.

Në këtë ceremoni kanë marrë pjesë ekipi i Dua Lipes dhe zyrtarë të tjerë.

“Me talentin e saj, me paraqitjet e saj, ajo ka lartësuar emrin e Kosovës në tërë globin. Kudo ku është Dua Lipa aty është edhe Kosova. Faleminderit Dua!”, ka theksuar Kadiu në këtë promovim.

Artistja e madhe u shpreh e lumtur që u bë pjesë e thesarit të pullave postare. “Është një nder i madh për mua. Do të vazhdoj të punoj në çfarëdo mënyre që mundëm për ta ngritur Kosovën sa më lartë”, ka thënë ajo.

Posta theksoi se “Kontributi i Dua Lipes në promovimin e Kosovës ka qenë i jashtëzakonshëm. Me festivalin Sunny Hill në Prishtinë ajo e bëri vendin e saj një nga qendrat më të mëdha botërore të festivaleve ndërkombëtare.

Dua plotësisht e meriton titullin Ambasadore Nderi e Republikës së Kosovës.

Posta e Kosovës ka nderuar dhe promovuar për mbi njëzet vite personalitete të shquara të kulturës sonë e këtë do ta bëjë edhe në të ardhmen.”