Shakira ka mashtruar për të shmangur detyrimet e saj tatimore në Spanjë
Shakira nuk po kalon kohë të mira pasi këngëtarja kolumbiane, përveçse duhet të përballet me një divorc të komplikuar me Gerard Pique ku do të jetë në rrezik kujdestaria e fëmijëve të tyre, po përballet me një gjyq të komplikuar në Spanjë për evazion fiskal të dyshuar.
Pas dështimit për të arritur një marrëveshje me autoritetet tatimore spanjolle, prokurorët kanë kërkuar që Shakira të dënohet me tetë vjet burg për mashtrimin e dyshuar të autoriteteve tatimore spanjolle prej 14.5 milionë eurosh.
Autoritetet spanjolle e akuzojnë Shakirën për kryerjen e gjashtë krimeve, tre prej tyre të lidhura me mashtrimin e tatimit mbi pasurinë midis vitit 2012 dhe 2014.
Tre krimet e tjera i referohen evazionit të tatimit mbi të ardhurat personale gjatë qëndrimit në Spanjë gjatë së njëjtës periudhë.
Edhe pse këngëtarja ka këmbëngulur gjithmonë për pafajësinë e saj, tatimet pretendojnë se Shakira i ka shmangur taksat dhe krahas dënimit me burg, i shtohet edhe një kërkesë për një gjobë prej 24 milionë eurosh.
Prokurorët thonë se Shakira jetonte “zakonisht në Spanjë” dhe se ajo qëndroi në vend pjesën më të madhe të vitit, kështu që ajo duhet të kishte paraqitur tatimin mbi të ardhurat personale dhe deklaratat e tatimit mbi pasurinë.
Sipas prokurorisë spanjolle, Shakira ka përdorur një rrjet të tërë kompanish për të shmangur detyrimet e saj tatimore në Spanjë.
Ishujt e Virgjër Britanikë, Luksemburgu, Panamaja dhe Malta janë disa nga vendet ku ajo thuhet se ka fshehur pasurinë e saj nga autoritetet tatimore spanjolle, së bashku me asetet e saj në subjekte të tjera me qendër në Spanjë, Shtetet e Bashkuara dhe Holandë.
Sipas Prokurorisë Publike, artistja nga Barranquilla e përdori këtë kornizë korporative si metodë për të tarifuar kompanitë në vend të vetes dhe asnjë prej kompanive nuk kishte strukturë të mjaftueshme apo mjetet e nevojshme për të kryer ndonjë aktivitet.
“Këto kompani janë krijuar me qëllimin e vetëm për të fshehur të ardhurat dhe pasuritë e Shakirës nga organet tatimore”, shkruan prokuroria.
” Marrëdhënia e vetme e Shakirës me Ishujt e Virgjër Britanikë, Ishujt Kajman, Maltën, Panamanë dhe Luksemburgun ishte se ato shërbyen për të kanalizuar lëvizjet e kapitalit të krijuara nga aktiviteti i saj profesional.”
