Shtëpia e Bardhë dekorohet për Krishtlindje, ja pema e Biden

Do të jenë Krishtlindjet e para në Shtëpinë e Bardhë, këto të këtij viti, për Joe dhe Jill Biden. Presidenti amerikan dhe zonja e parë kanë dekoruar të gjithë rezidencën, përfshirë dhe zyrën Ovale, me 41 pemë.

Janë dashur pothuajse 2 kilometra nastro dhe më shumë se 10 mijë ornamente për të zbukuruar shtëpinë e çiftit presidencial, që i ka titulluar dekorimet ‘Dhurata nga zemra’.

Mes shumë aksesorëve zbukurues edhe një miniaturë prej keku me xhenzifil e Shtëpisë së Bardhë në nder të atyre që punojnë kundër koronavirusit.

“Gjërat që ne i konsiderojmë të shenjta na bashkojnë dhe kapërcejnë distancat, kohën dhe madje edhe kufizimet e një pandemie. Besimi, familja dhe miqësia, dashuria për artet, mësimi dhe natyra, mirënjohja, shërbimi dhe komuniteti, uniteti dhe paqja. Këto janë dhuratat që lidhin kordat e zemrave tona dhe të jetëve tona. Këto janë dhuratat e zemrës’, shkruan çifti Biden për festat e Krishtlindjeve.